Something is Coming ရှိုးလုပ်ဖြစ်တာဟာ Underground ဈေးကွက်တစ်ခု စဖောက်ကြည့်တာလို့ ဖွင့်ဟလာတဲ့ ကြက်ဖ (Interview)


မြန်မာနိုင်ငံရဲ့ Hip Hop ဂီတလို့ဆိုလိုက်ရင် ဒီဂီတရေစီးကြောင်း ပိုမိုအရှိန်အဟုန်ကောင်းလာအောင် ၀ိုင်းဝန်းကြိုးစားခဲ့ကြသူတွေထဲက တစ်ဦးဖြစ်တဲ့ Second Generation က ကြက်ဖအကြောင်း မပါလို့ မဖြစ်ပါဘူး။ ခင်မင်သူတွေ ကိုကြက်လို့ ခေါ်ကြတဲ့ ကြက်ဖဟာ ကိုယ်ရူးသွပ်ရာ မြူးဇစ်တွေကို ဖန်တီးခဲ့ရုံသာမက သရုပ်ဆောင်အလုပ်ကိုပါ တွဲဖက်လုပ်ကိုင်ခဲ့သေးတာ အားလုံးအသိပါ။ ခုဆိုရင် ဒီလောကထဲမှာ သူကျင်လည်ရင်း ဒီအနုပညာလမ်းပေါ်လျှောက်လှမ်းလာခဲ့တာ သက်တမ်းက ၁၃နှစ်နီးပါးရှိခဲ့ပါပြီ။
လူငယ်တစ်ယောက်ပီပီ သူဆိုးခဲ့မိုက်ခဲ့၊ ရေစုန်မျောခဲ့တဲ့ အချိန် သုံးနှစ်နီးပါးလောက်ရှိခဲ့ပေမယ့် ခုမကြာသေးခင်က ကျင်းပပြုလုပ်ခဲ့တဲ့ Something is Coming ဖျော်ဖြေပွဲနဲ့အတူ အားလုံးရှေ့ ထူးထူးခြားခြား ပြန်လည် ရောက်ရှိလာခဲ့ပါပြီ။ ထူးထူးခြားခြားလို့ဆိုရတာကတော့ ဒီပွဲဟာ Underground က လူငယ်တွေအတွက် ရည်ရွယ်ရင်း သူကိုယ်တိုင်ပွဲစီစဉ်သူတစ်ဦးအနေနဲ့ ဆောင်ရွက်ခဲ့သလို ကိုယ်တိုင်လည်း ဖျော်ဖြေပေးခဲ့တဲ့ ပွဲလေး မို့လို့ပါပဲ။ ကြက်ဖနဲ့ ပြောဖြစ်ခဲ့တာလေးတွေ ဝေမျှရရင်တော့ 
-ပထမဆုံး Something is Coming ရှိုးလေးရဲ့ အခြေအနေလေးကိုလဲပြောပြပေးပါဦး။
ရှိုးကတော့ မိုက်ပါတယ်။ မိုက်ပေမဲ့နေရာက ကျဉ်းသွားတယ်။ ကျွန်တော်တို့အဲ့ဒီလောက်ကြီးလဲ မှန်းမထားဘူး။ အစကတည်းက မှန်းထားတာက ၃၀၀လောက်ပဲ။ ဒါပေမဲ့အဲ့ဒီနေ့က အသိတွေဝင်တာနဲ့ဘာနဲ့ကျောင်းကကြည့်မယ်ဆိုတဲ့ သူတွေလဲလာတာနဲ့အဆိုတော်နဲ့ပေါင်းရင် ၅၀၀လောက်ဖြစ်သွားတယ်။ အရမ်းတော့ကြပ်သွားတယ်။
-အရှေ့မှာလဲ အစ်ကိုအနေနဲ့ကရှိုးမလုပ်တာကြာပြီဆိုတော့ အဲ့ဒီပွဲလေးကိုရော ဘယ်လိုကဘယ်လိုလုပ်ဖြစ်သွားတာလဲ။
လုပ်ဖြစ်သွားတာက တခြားတော့ မဟုတ်ပါဘူး။ ပဒုမ္မာကွင်းနားက Terminal 5 ဆိုတဲ့ ဘားမှာ Underground ပွဲလေးတစ်ပွဲလုပ်တော့ ကျွန်တော်သွားဖြစ်တယ်။ အရှေ့မှာ Underground ပွဲတွေမသွားဖြစ်တာကြာပြီ။ နီးလဲနီးတော့သွားကြည့်ဖြစ်လိုက်တယ်။ အဲ့ဒီမှာ တစ်ခုစဉ်းစားမိတာက Underground ပွဲဆိုရင် ကလေးတွေက ပိုက်ဆံမရကြတာများတယ်။ ကျွန်တော်တို့ခေတ်တုန်းကလဲ မရခဲ့ပါဘူး။ ဒါပေမဲ့ကျွန်တော်ဘာလုပ်ပေးရင်ကောင်းမလဲဆိုပြီး တွေးမိတယ်။ ဥပမာ သူတို့လာဆိုတဲ့အခါ Taxi ခကုန်တယ်။ အ၀တ်အစားခ ကုန်တယ်။ စီဒီခုတ်ခ၊ စတူဒီယိုသွားပြီးအသံချိန်ခအဲ့လောက်လေးတောင် အရင်းပြန်မကျေဘူးဖြစ်နေတယ်။ အဲ့ဒါနဲ့ကျွန်တော်က အဲ့ဒီတစ်ပွဲကိုလုပ်ကြည့်မယ်ပေါ့။ Underground ပွဲဆိုပေမဲ့ စပွန်ဆာတွေဘာတွေတောင်းကြည့်လိုက်တယ်။ တစ်ခါမှလဲ မလုပ်ဖူးပါဘူး။ ပြီးတော့ဈေးကွက်ကိုလဲ တစ်ချက်သိချင်တာနဲ့လုပ်ကြည့်လိုက်တယ်။ အဲ့ဒီအခါမှာ သူတို့လေးတွေအယောက်စီတိုင်းကိုလဲပိုက်ဆံပြန်ပေးနိုင်တယ်။ အဓိကက အဲ့ဒါမို့လိုအဲ့ဒီလိုလေးဖြစ်မြောက်သွားတော့ကျေနပ်ပါတယ်။
-ဒီပွဲလေးကအောင်မြင်ခဲ့တော့ နောက်ပွဲတွေရောထပ်လုပ်ဖို့အစီအစဉ်ရှိသေးလား။
Underground ပွဲတွေကတော့ ဆက်တိုက်လုပ်သွားချင်တယ်။ ဒါပေမဲ့အခုတော့ ကြိုးစားနေတုန်းပေါ့။ ပွဲလေးတွေကတော့ လုပ်တတ်သွားတော့ သိပ်အပန်းမကြီးတော့ဘူး။ ပွဲကြီးတွေကတော့ ခက်ဦးမယ်။
-ပွဲမတိုင်ခင်ကအစ်ကိုပျောက်နေတယ်။ သိပ်မတွေ့ရဘူးပေါ့။ ဘာတွေလုပ်နေလို့လဲ။
ကျွန်တော်အမ်တီဗီတွေရိုက်တယ်။ အွန်လိုင်းကလဲ သိပ်မသုံးဖြစ်ဘူး။ မသုံးတာမှ တော်တော်နှစ်ရှည်လများကိုမသုံးဖြစ်တာ။ အခုဒီနှစ်ထဲမှာမှ တွင်တွင်ကျယ်ကျယ်ပြန်သုံးဖြစ်တာပေါ့။ ဒါတောင်မှ ဘာလုပ်ရတယ်ဘာညာသိပ်နားမလည်သေးဘူး။
-အရှေ့မှာလဲ Underground လူငယ်တွေနဲ့သီချင်းလေးတွေ လုပ်ဖြစ်နေတယ်လို့လဲသိရတယ်။
ဟုတ်ပါတယ်။ ဒါကတော့ ဒီလောကမှာ ဒီလိုပါပဲ။ ကိုယ်ကြိုက်တဲ့သူနဲ့သီချင်းတွဲ လုပ်ကြတယ်။ ပြီးရင် ဆုံတဲ့သူတွေနဲ့လဲ သီချင်းလုပ်ဖြစ်ဖို့စဖြစ်သွားတာကများတယ်။
-ထက်ယံအခွေမှာလဲ အစ်ကိုပါဝင်ထားတာတွေ့ရတယ်။
ဟုတ်ပါတယ်။ ထက်ယံကတော့ သူကလာကမ်းလှမ်းလို့လုပ်ပေးဖြစ်တယ်။ သူနဲ့ကျွန်တော်ကလဲ ဒီအခွေကျမှ စဆုံဖူးတာ သူ့ရဲ့ဒုတိယအခွေမှာ ကျွန်တော်နဲ့လိုက်မယ်ထင်တဲ့ အပုဒ်လေးတစ်ပုဒ်ကိုသူရေးထားတယ်ပေါ့။ ကျွန်တော်နဲ့ဆိုရင်လိုက်မယ်ဆိုပြီးကမ်းလှမ်းတာနဲ့လုပ်ဖြစ်သွားတာပါ။
-အရှေ့မှာလဲ Underground ကလူတွေနဲ့သီချင်းတွေလုပ်ဖြစ်တယ်။ ပြီးတော့လဲ Something is Coming ဆိုတဲ့ ရှိုးလေးဖြစ်လာတယ်ဆိုတော့ Underground ကလူငယ်တွေကို Second Generation က အကြီးတစ်ယောက်အနေနဲ့Support လုပ်ပေးပြီး ပြန်ကြည့်တဲ့သဘောလား။
Support လုပ်ပေးချင်တဲ့သဘောမျိုးတော့ မဟုတ်ပါဘူး။ ဥပမာ ရှင်းရှင်းလေးပါပဲ။ ရေအိုးတစ်လုံးရှိတယ်ဆို မိုးရွာတယ်။ ကျွန်တော်တို့ကတွေ့တဲ့ရေအိုးကိုကောက်ခံလိုက်မှာပဲ။ ကျွန်တော်တို့သောက်ဖို့လဲ မဟုတ်ဘူး။ ရေအိုးရဲ့သဘောကိုက ရေဖြည့်ဖို့ပဲလေ။ ကျွန်တော်ကတော့ အဲ့ဒီလိုပဲ ယူဆတယ်။ မြေတောင်မြှောက်ပေးတယ်လဲ မဟုတ်ဘူး။ Support လုပ်ပေးတယ်လဲ မဟုတ်ဘူး။ ကျွန်တော်သိတာက သူတို့ဆိုတာ မိုက်တယ်။ အဲ့အတွက်ကြောင့်သူတို့ကိုနားထောင်ကြည့်စေချင်တယ်။ သူတို့ကိုနားထောင်ကြည့်ချင်တဲ့ ပရိသတ်လဲရှိတယ်။ သူတို့ကိုလဲ အဲ့ဒီနေရာမှာရှိစေချင်တယ်။ အဓိကရည်ရွယ်ချက်ကတော့ Underground ကိုဈေးကွက်တစ်ခုဖောက်ကြည့်တာပါ။
-လက်ရှိ ဂီတလှုပ်ရှားမှု အနေနဲ့ရော ဘာတွေလုပ်ဖြစ်နေလဲ။
ကျွန်တော်အခွေလေးပြန် Run နေတယ်။ သီချင်းအသစ်တွေပေါ့။ နောက်အဟောင်းထဲက မပြန့်သေးတဲ့ သီချင်းတွေနဲ့အသစ်ထဲကဟာတွေကိုပြန်ရောပြီး ဘယ်လိုလုပ်မလဲတော့ မသိသေးဘူး။ ဒါပေမဲ့ အွန်လိုင်းပေါ်ကပဲတင်ဖို့များမလားပေါ့။ အခွေမထုတ်ဖြစ်ရင်တောင် အွန်လိုင်းကနေတင်ပေးဖို့ရှိတယ်။
-အစ်ကိုတို့ Second Generation ကဆိုရင် ကိုဂျေမီတို့ဆိုရင် X box တို့နဲ့သီချင်းတွေတွဲလုပ်ကြတာမျိုးရှိတယ်။ အစ်ကို့အနေနဲ့ကျတော့ အရှေ့မှာအတော်လေးပျောက်သွားခဲ့တော့ အသစ်တွေဆွဲတင်တာမျိုးလဲမရှိသေးတော့လေ အဲ့ဒီအပိုင်းလေးနဲ့ပတ်သက်ပြီးတော့လဲပြောပြပေးပါဦး။
ကျွန်တော်တို့လူငယ်တွေသဘာဝ ဆိုးခဲ့မိုက်ခဲ့တာတွေရှိတယ်။ အဲ့ဒီဟာတွေမှာ ကျွန်တော်သောင်တင်သွားတယ်။ အမှန်အတိုင်းပြောရရင် ကျွန်တော့်ဘ၀ကိုကျွန်တော်ရေစုန်မျောမိခဲ့ဖူးတယ်။ ကိုယ့်ကိုကိုယ်မနည်းပြန်ထူထောင်နေရတဲ့ အချိန်မျိုးပေါ့။ အဲ့ဒီမှာအချိန်ကြာသွားတာပါ။ ခန့်မှန်းခြေသုံးလေးနှစ်လောက်ကြာသွားတယ်။
-အခုပြန်လုပ်ဖြစ်တဲ့အချိန်မှာရော အရင်ကလုပ်ခဲ့တဲ့ပုံစံတွေနဲ့အခုလုပ်ခဲ့တဲ့ ပုံစံတွေကဘယ်လိုမျိုးကွာခြားသွားမလဲ။
ကျွန်တော်ငယ်ငယ်တုန်းက ပထမဆုံးစပြီး Active ဖြစ်တဲ့ mood ကို မရရအောင်ပြန်ယူတယ်။ ၁၇လောက်က ဆေးလိပ်လဲမသောက်တတ်၊ ဘာဆိုဘာမှမလုပ်တတ်ဘူးပေါ့။ အဲ့ဒီလိုအနေအထားကနေ လုပ်ခဲ့တာဆိုတော့ အဲ့ဒီတုန်းကအရမ်းတက်ကြွတယ်။ သီချင်းနှစ်ပုဒ်လောက်ကိုကျောင်းတက်ရင်းတစ်ဖက်နဲ့ကောင်းကောင်းလုပ်နိုင်တယ်။ အဲ့ဒီလိုဆိုတော့ အခုအဲ့ဒီနောက်ကိုပြန်ပြီး အမှီလိုက်နေပါတယ်။
-Flow ပိုင်းနဲ့ပတ်သက်ပြီးတော့ရော အခုနောက်ပိုင်းမှာ ဘယ်လိုမျိုးလေးပြောင်းလဲလာတာမျိုးရှိမလဲ။
Flow ပိုင်းက ကျွန်တော်မြန်မာပိုဆန်လာဖို့ရှိတယ်။ အခုထွက်သွားတဲ့ ဗျူဟာအခွေထဲမှာလဲ တစ်ခုပေါ့။ ပြီးရင်ကျွန်တော့ ပထမ Solo မှာတုန်းကရေးထားခဲ့တဲ့ ငါမရှိတော့တဲ့နောက်ဆိုတဲ့ သီချင်းထဲက Flow ပုံစံမျိုးကိုပိုကြိုက်တယ်။
-အစ်ကို့ကိုဆို Rhyme တွေအရမ်းကောင်းပြီး ထိမိတယ်။ အစ်ကို့ပုံစံကလည်း သီးသန့်အမြဲကွဲထွက်နေတယ်ဆိုတော့ အဲ့ဒီအကြောင်းလေးပြောပေးပါဦး။
ကျွန်တော်စာမဖတ်တာကြာပြီပေါ့။ စာပြန်ဖတ်ဖို့တော့စဉ်းစားထားတယ်။ PDF တွေတော့စုထားတယ်။ ဒါပေမဲ့ပြန်ဖတ်ဖို့ကို အချိန်မပေးဖြစ်တာပေါ့။ စာတွေပြန်ဖတ်ဖို့ကိုဆုံးဖြတ်ထားပါတယ်။
-နောက်တက်တဲ့လူငယ်တွေမှာ အစ်ကိုကြိုက်တဲ့ လူတွေရှိရင်လဲပြောပေးပါဦး။
ဝေကြီးနဲ့လောက်စာလုံးကို အရမ်းကြိုက်တယ်။
-လက်ရှိနားထောင်ဖြစ်နေတဲ့ သီချင်းတွေကိုလဲသိချင်ပါတယ်။
ခင်မောင်တိုးနားထောင်ဖြစ်တယ်။ အတွင်းပိုင်းကဆို Mixtape တွေ နားထောင်ဖြစ်တယ်။ အဲ့ဒီလို Mixtape တွေနားမထောင်ဖြစ်တာတောင်ကြာပြီ။ အခုဆို ဇွဲသက်ပိုင်ရဲ့ Haters Gonna Hate နားထောင်တယ်။ နောက် ကျွန်တော်တို့Page မှာပေါ်လာတာလေးတွေ နားထောင်ဖြစ်တယ်။ အရင်က Underground အခွေဆိုတာ ရှားတယ်။ အခုကျတော့ အရမ်းကြီးများလာတာပါတယ်။ ကျွန်တော် သိပ်မကြိုက်တာလဲပါတယ်။ ကျွန်တော်ကြိုက်တာဆို ကျွန်တော်နားထောင်ဖြစ်ပါတယ်။
-အစ်ကို့ကို ၁၃ နှစ်ကြာအားပေးလာတဲ့ ပရိသတ်တွေကိုရော ဘာများပြောချင်သေးလဲ။
ကျွန်တော်စုပေါင်းစပ်ပေါင်းလုပ်ထားတာ အပုဒ် ၂၀လောက်ရှိမယ်။ Solo ကြီးပဲက ၇ပုဒ်လောက်ရှိတယ်။ အဓိကက အချောမသွင်းရသေးတာလဲပါတယ်။ ရေးပြီးသားစာအုပ်တွေပေါ်မှာရှိသေးတယ်။ အကြမ်းတောင်မသွင်းရသေးဘူး။ ထုတ်ရင်ကောင်းမလား။ ဖြန့်ရင်ကောင်းမလား။ စဉ်းစားနေတုန်းပါပဲ။ သီချင်းပုံစံတွေက ကိုယ်ထူကိုယ်ထအကြောင်းတွေပါတယ်။ အခုထိအားပေးနေတဲ့သူတွေကိုလဲကျေးဇူးတင်ပါတယ်။ တချို့ဆို တော်တော်တောင်အိုနေကြပြီ။ အခွေကတော့ ထွက်မလာရင်တောင်မှ အွန်လိုင်းကနေ တင်ပေးပါ့မယ်။ အခုထွက်ထားတဲ့ အမ်တီဗီ စကားဆိုတဲ့ အပုဒ်လေးအဲ့ဒါလေးလဲတော်တော်ပေါက်တယ်။ တချို့ကအားမရဘူး။ အခွေထုတ်လိုက်ပါလားပေါ့။ ကျွန်တော်ပြောချင်တာက အခွေထွက်သည်ဖြစ်စေ၊ မထွက်သည်ဖြစ်စေ အားပေးနေတဲ့ ပရိသတ်ကလဲ လက်ထဲရောက်လာတာနဲ့အသစ်ဖြစ်နေတယ်ဆိုရင်ပြီးတာပါပဲလို့အားလုံးကိုကျေးဇူးတင်ပါတယ်။
trend.com.mm (ခင်ဆွေသက်)

0 comments:

ဝေဖန်မှုတွေကို ကြိုဆိုလျက်ပါ..